حان وقت النكد

اقترب من سيجارتى بعود الثقاب احب ان ارقب عود الثقاب و هو يلتقط النار و يتوهج انظر الى سيجارتى و انا اقترب اليها بالعود اكاد اشعر بلهفتها بين اصابعى كانما قلبها تتسارع نبضاته اقترب ببطء و انتظر دائما ما كنت اظن ان السيجارة بها كائنات من حمقها تحلم بان تشتعل تظن ان هذا هو متنهى اللذة. لكن الحقيقة هى ان اشتعالها لا يعنى الا احتراقها و انطفائها يعنى فنائها الى الابد و الان السؤال هل اشعلها حقا كما تريد ام اتركها فى انتظار هكذا

فاصل اعلانى و نعود للنكد بكرة انشاءالله

الشنطة الفضى

عادت احدى صديقاتى من بلاد الفرنجة و تقابلنا علشان تدينى الهدية اللى جبتها لى ووقفت امامى و هى تخبىء الهدية وراء ظهرها و تبتسم ببلاهة تفتكرى جبتلك ايه؟ رديت على الابتسامة بواحدة اكثر بلاهة ايه بقى ؟ انتى عارفة انا مش بحب الطريقة دى قولى على طول.
فى حركة مسرحية اخرجت من وراء ظهرها شنطة ايد لونها فضى ترررااا فتحت بقى من فرط الدهشة و الصدمة و هى مازالت محتفظة بنفس البلاهة بس اضافت لها نظرة ترقب لرد فعلى. رد فعلى طبعا صدمة عصبية حادة انا حد يجبلى شنطة فضى دى اهانة لا يمحوها الا الدم و لعدة ثوان مخى قعد يودى و يجيب ياترى اى حتة فى شخصيتى بالضبط اللى اوحت لها انى ممكن امسك شنطة ايد فضى يمكن مودة اليومين دول بس انا بس مش فاكرة انى شفت ناس ماسكة شنط فضى قريب و طبعا مش ممكن اقهر البنت على نفسها فتماسكت و قولتها ياااى ى تجنن حقيقى هى دى الحاجة اللى كانت ناقصنى احمدك يارب عرفتى منيني يا شقية ان كان نفسى فى واحدة و نظرا انى بالغت فى رد فعلى صدقت هى و قعدت تشرح مميزات الشنطة بصى انا جيتها كبيرة علشان انتى بتحبى الشنط الكبيرة. ميرسى قوى جاء ردى و انا باقول فى سرى يارتيها كانت اكبر كنت طبقتك و حطيتك فيها و رميتكوا انتوا الاتنين فى النيل والافكار دى كلها فى دماغى و انا محتفظة بابتسامة الصداقة على وشى.
فى البيت وقفت امام المرايا احاول ادى نفسى انا و الشنطة فرصة تانية مسكتها من ايدها لا برضه ماينفعش طب اعلقها على كتفى برضه مش قادرة مش قادرة يمكن لو علقتها فى رقبتى البسها على راسى طيب بس اخيرا توصلت للطريقة المثلى للتعامل مع هذة المصبية حطتها فى كيس اسود و دفستها فى قعر الدولاب الى الابد و دى كانت نهاية الشنطة الفضى

جاءت و لا اعلم لما جاءت حبيبتى نظرت الى عيناى و اعطتنى قبلة بطعم الزهور و وقفت و انا اراها ترحل اعلم انى انا لن استطيع ان ابقيها هنا فى حضنى الى الابد اعلم انى مجرد لعبة جديدة من العابها انا مجرد حضن تختبىء فى من احزانها تاتينى كما تاتى الى حانة فى قلب الليل تتسلل و انا كالبارمان اعتدت صحبة الغرباء تجلس فى ركن بعيد مظلم يخبىء عنى ملامحها تنتظر حتى يرحل الجميع و تشير الى اقترب فى هدوء و حكمتى تحذرنى ان من ياتون الى الحانات غالبا ما يتركون قلوبهم فى اماكن اخرى .اقتر ب و توقفنى و تطلب منى انا اضع كرسى فى ظهر كرسيها وانا اجلس و ظهرى لها و اعترض بانى لن اراها فتهم بالرحيل ارجوها ان تبقى و يدور بينا الاحاديث و الليل ينسحب من تحت قدمينا و انا اسمع و اسمع كانى لم اسمع كلام من قبل و هى تشكو و تشكو من ان قلبها ليس ملكها و ان الجروح ارهقتها و جاء وقت الرحيل وقفت و طلبت منى الا استدير وقالت انها تعلم انى وحدى استطيع ان انسيها هذا القلب الذى جرحها و فى نشوة غرورى استسلمت اليها واعلنت انى سانسج لقلبها عشق يرد عنها الصقيع و انى ساكون لها فى ليال وحدتها جنى يفعل كل ما تريد ,ارسم خريطة قلبها من جديد. واخذت انتظر ان تاتى كل يوم و نجلس و انا ظهرى لها و تحدثنى و احدثها و يخدر قلبى صوتها يسلبنى عقلى ياخذ كل حكمتى يلقيها فى هوة عميقة بلا نهاية و انا لا ابالى و ترحل و تاتينى و ترحل وكل يوم تقتنص من قلبى نصر جديد تغزو من روحى ركن جديد و انا اعلم و ارى ان صارت هى جنيتى و لكنها لن تحقق لى كل ما اريد فقلبها مازال فى ذلك المكان البعيد و ما انا لا بارمان تاتيه تحت ستار الليل تغيب فى اوهام اخلقها لكى تشفى من مرض لاتريد هى ان تشفى منه و سياتى يوم و لن تعود و سابقى انا هنا وحدى على كرسى ظهره الى كرسى خالى

اقتحمتنى كما لم يقتحمنى احد من قبل احرقت اوراق اللعب و حطمت قطع الشطرنج بقدميها و كسرت رقعة الشطرنج على راسى و جلست على ساقى واجهتنى و اطفئت سيجارتها فى قلبى ثم رحلت

انا شربت حشيش يا سعاد الاخير

هل راى الحب سكارى مثلنا ترلم لم الاغنية دى قعدت تزن فى دماغى و انا بركن العربية فى حتة بعيد عن المحل اللى هاشترى منه البضاعة دخلت المحل و كعادتى كنت لما بادخل حتة كنت لسه هاقول السلام عليكم لقيت انها بايخة على المكان طب اقول مصاء الخير عالم البحار هاااهاااا لا لا انا هاقول عمت مساءا يا رجل الديك جعة و نبيذ ها هاهاها و يظهر انى ابتديت اضحك بصوت عالى فواحد من المحل جه ناحيتى و قال اقدر اساعدك سيادتك اجيب لحضرتك حاجة تنحنحت كدة و لمت نفسى و قلت له اه اكيد طبعا بس اصل انا كنت جاية اجيب حاجة صفرا بس الحقيقة لقيت عندكوا كل الالوان و انفجرت فى نوبة ضحك حادة لدرجة انى ماكنتش قادرة اقف طبعا الراجل قال ايه الولية المجنونة دى فحاولت و ا نقاذ الموقف سورى معلهش بص يظهر انى سكرت من منظر الازايز وتانى رحت ميتة من الضحك هااههههههههههه لالا شششششش امسك نفسك كدة يا راجل بلاش ضحك و الراجل واقف متنح هو حضرتك عاوزة ايه بالضبط بصيت له هههههههه تشكيلة كدة جعة و نبيذ هههههههه بس اصل انا مابشربش بص لى و ابتسم و قال واضح فمسكت نفسى من الضحك شوية و قلت لا والله انا مابشربش بس جايلى ضيوف و عايزة اكرمهم فقلت اجيب لهم بس ممكن تساعدنى اعرف اجيب ايه ؟ الراجل قعد ساعة يشرح لى الانواع و نسبة السبرتو اللى فيها و طعمها و ده يمشى مع الستات و ده يمشى مع الرجالة و انا بصراحة تهت منه و كل شوية اسخسخ منه و اقوله يا راجل حاول و فجاءة قولت طب ممكن فيروز كانز من فضلك ؟ طبعا لاقيت نفسى بره المحل و الراجل بتاع السيكيورتى بيقولى لما حضرتك تفوقى ابقى تعالى و ليه بس كدة دة انى حتى شكلك بنت ناس سكر كدة و احنا لسه فى اول الليل احسن اوقف لك تاكسى علشان ماينفعش تسوقى فى حالتك ده . بصيتله شويه و قلت ها اه احسن برضه لاحسن اعمل حادثة و لا حاجة ههههههههه ههههههه انا سكرت على الريحة ولا ايه


و دى كانت اخر محاولات الانحراف على الاقل دلوقتى و على راى الاجنداة الحمرا الصياعة لها ناسها و يظهر انى مش منهم

انا شربت حشيش يا سعاد2

نفس الملحوظة اللى فى البوست اللى فات علشان انا مابحبش الكلام الكتير

مشهد داخلى فى احد المؤسسات الحكومية

انا باغنى فى سرى طبعا حفاظا على الهيبة و الوقار فى مكان عملى الرسمى يا ليلة بيضا عفش بيتكوا ولع شرب السبرتو و نزل يطوح الاغنية هى دى اللى جت على بالى و انا فى طريقى لام رشدى و مين ام رشدى بقى ؟ ام رشدى هى الست اللى هتظبط المسائل. اصل انا سمعت ان عندنا فى الشغل واحدة ست ابنها اتمسك فى قضية و لامؤاخذة مخدرات و فقررت اروح اكلمها يمكن اقدر اطلع منها بحاجة.
صباح الخير يا ام رشدى ياترى رشدى اخباره ايه؟
اهو متلاءح فى الحبس ربنا يفك حبسه. – امين يارب انما قولولى يا ام رشدى هو رشدى ما سابش حاجة كده و لا كده فى البيت. الست ام رشدى حواجبها عملوا تامنية و مناخريها فتحت على الاخر و بصت لى حاجة زى ايه يا استاذة؟؟ اوبا ام رشدى طلعت مش من العصابة و ملهاش فى المسائل الم الدور بقى بسرعة
قصدى تكون حتة وقعت منه كدة و لا كدة لاحسن البوليس يطب يفتش و لا حاجة تروحى انتى كمان فى سين و جيم انا حبيت بس اقولك مناخير ام رشدى رجعت لحجمها الطبيعى تانى و قالت اه هو يقدر يدخل حاجة زى دى البيت ده انا كنت قطعت خبره. بس فشلت اوبريشن ام رشدى فشل ذريع و رجعنا تانى الى سكوير وان
بس كده يعنى ايه مافيش انحراف ؟ لا انا مش هستسلم بلاهة حشيش خلينا فى السبرتو قصدى المشروبات الروحية و اهى موجودة فى كل مكان دلوقتى اذن فليكن الى محل خمور و اليوم لا حشيش بس بكرة خمروون و نساء على طريقة الكفار فى الافلام الدينية.

و توبى كونتينيود
و بناءا على طلب الجماهير تيتيرات النهاية اعادة لاغنية حسرة عليها يا حسرة عليها جت راجليها ما جت راجليها

انا شربت حشيش يا سعاد 1

قبل ماحد يغلط و يقول اى حاجة او يمد ايده احب ان اوضح ان الاحداث الاتية خيالية و لا تمت ببصلة قصدى بصلة للواقع و ان اى تشابه بينها وبين الواقع هو مسئولية اللى شايف نفسه كدة و لامؤاخذة .

اليوم و كل يوم بنجاح كبير ان قررت انحرف طيب علشان الواحد ينحرف فى البلد دى يعمل ايه ؟ الغريب ان الواحد يفضل عامل نفسه اسد و ساعات الجد يبقى ميت فى جلده بس انا بجد المرة دى هانحرف يعنى هانحرف .
طيب انحرف فى الحقيقة يعنى على ارض الواقع و لاانحرف على النت برضه النت امان يعنى الواحد محدش شايفه بس انحراف النت كلام و الواحد عايز انحراف يكون كده على مستوى و يعمل دماغ كده يمكن ربنا يفتح عليه بكلمتين يكتبهم و يعمل شغل بس ربنا هيفتحها ازاى فى وش حد نفسه ينحرف ؟

طيب هانحرف فى الواقع بس هانحرف كده لوحدى منى لنفسى و دى خلقة حد ينحرف معاها برضه اذن حتما و لابد استعين بصديق بس مين بقى الصديق ده مراجعة صغيرة لقائمة الاصدقاء فى نافخوى لايوجد حد فى نطاق الخدمة قصدى مافيش حد يبدو عليه بتاع انحراف اصل اصحابى كلهم ولاد ناس طيبين و مالهومش فى اى نوع من الانحراف اقصى انحراف كان انهم مرة راحوا حفلة 9 فى السينما و انهم شربوا بيبسى ماكس ( ده اعلان مدفوع الاجر من الكشك الى تحت البيت) بالليل و معرفوش يناموا.
بعد تفكير عميق على مستوى انحرافى عال المستوى و اجتماعات متعددة الاطراف مع نفسى و نفسى الامارة بالسوء ونفس تانية كدة معرفش جت منين توصلت لهذا البيان الهام انا هانحرف و هانحرف لوحدى فى ارض الواقع و قد وقع الاختيار على انى اعمل دماغ انا (قررت اشرب حشيش (موسيقى تعبر عن الموقف و كلوز اب لا مش معجون الاسنان قصدى كلوز اب للورقة الى كتبت عليها القرار

تيترات النهاية للجزء الاول و موسيقى تصويرية من نوع حسرة عليها يا حسرة عليها