الملاك الحارس

من الغريب تتجمع كل حكاياتى فى حكاية واحدة كأنى اشاهد مشهد من كل حكاية عشتها و ان تتصاعد الاحداث تصاعدا دراميا مثير لحد الضحك لدرجة الاستلقاء على ظهرى و ان العب كل الادوار التى لعبتها فى ان واحد حتى انى احس انى بطل فى فيلم لا يوجد فيه ابطال غيرى يظهر المنتج كان مزنوق فى الفلوس شويه حاليا هو صحيح فى بطلة و بطلة اكيد مش بطل لامؤخذاة و بس انا بقى باقوم بباقى الادوار انا ام البطلة و اخت البطلة التانية وانا الخطيب اللى هينسحب بهدؤ علشان الابطال يتجوزوا و انا سواق التاكسى و الجرسون اللى بيقدم الليمون و انا الشريراللى بينضرب و ربما البوليس يلمه فى البوكس ( جهزى الببسيى ماكس يا هارت بيت و جهزى الشنطة يا اجندا علشان انا هاعترف عليكى بجد المرة دى علشان تونسينى فى الزنزانة) . ان احس كل المشاعر التى شعرت بها فى عمرى كله من حب و عشق و توهة و الم و غيرة و انكسار و فرحة و راحة و خوف و ضعف و قوة اه و الله كل ده طلعة و احدة كدة لدرجة انى ساعات بتلخبط هو انا حاساه باية دلوقتى يعنى المفروض انى اكون خايفة موت دلوقتى بس الحقيقة انى متنحة لدرجة انى شاكة انى بتعاطى حاجة من ورايا ( اصل انا مش باقول حاجة لنفسى ) و لما مفروض اكون هاموت من الغيرة باحس انى اعصابى فى ثلاجة و انى سعيدة لدرجة غير طبيعية ( على ما اظن ده اما نوع من انواع الهبل و اما انى نوع خاص من البشر). و عندما يكون مفروض الم هدومى و امشى و اكون عاملة اعيط و اسمع فى اغانى من نوع اصعب حب و فضلتك على كل الناس و بعد الرحيل او كتاب حياتى يا عين ( ذوقى مهبب فى الاغانى معلهش ) الاقى نفسى مستعدة افضل العمر كله بدون مقابل فى مكانى فقط حتى املك حق معرفة انها بخير و سعيدة . انا كبشر لن استطيع ان العب كل هذة الادوار و لا ان اقدم اى تضحية و لكن من الاسهل ان اتفق مع المخرج و الكاتب ان يجعلنى العب دور الملاك الحارس للبطلة حتى اتمكن من ان اقوم بدورى و اصنع المعجزات التى تحتاجها هذة القصة حتى تنتهى النهاية التى اريدها . مش قلت لكم الحكاية كوميديا سوداء انا ملاك حارس حقيقى هذة هى سخرية القدر